ખાનગી

ના જરી દેખાવ, એની બંદગી છે ખાનગી,
ભીતરે જે ઝળહળે, એ આરતી છે ખાનગી.

એ મને જોતાં જરા મલકે, પછી નીચું જુએ,
ગામ આખું ઓળખે, પણ લાગણી છે ખાનગી.

મંચ પર ભાષણ થયું, ને ચેક મોટો દાનનો,
ને પછી ‘ટેન્ડર’ તણી એ માગણી છે ખાનગી.

મા સવારે ઝૂંપડીના ગોખમાં દીવો કરે,
કોઈ ના દેખે, છતાં એ રોશની છે ખાનગી.

આ પરાગે ના કશું બોલ્યા વિના ફોરી હવા,
ફૂલ ને એ બેઉ વચ્ચે પાંખડી છે ખાનગી.

– પરાગ રતનપરા

#ગઝલ #ભક્તિ #મૌનપ્રેમ #દંભ #મા #પરાગરતનપરા
#GujaratiGhazal #SecretDevotion #QuietLove #Hypocrisy #Mother #ParagRatanpara