કસોટી

કેટલાં લેશો પારખાં, શ્યામ, હવે તો હારી રે,
તમને ગમ્યું તે ઝેર પીધું, ને ઓઢી લીધી ગાળ્યું સારી રે.

દીવો બાળ્યો આખી રાતે, તેલ ખૂટ્યું ને વાટ,
તોય ન આવ્યા, શ્યામ, તમે તો જોવડાવી બસ વાટ;
મેં તો કાળજડાની વાટ્યું કરીને જ્યોત ઉજાળી રે…
કેટલાં લેશો…

ગામ કહે કે ‘ઘેલી થઈ છે’, સાસુ કહે ‘નફ્ફટ’,
રાણાજીએ પહેરો મૂક્યો, બંધ કર્યાં સૌ કમાડ;
મેં તો ભીંતે ચીતર્યા તમને, ને ખોલી મનની બારી રે…
કેટલાં લેશો…

પરાગ કહે: આ પ્રેમની ઘાટી, કોઈ પાર ન પામે,
કસોટીમાં જે બળી બળીને, સોનું થઈને જામે;
શ્યામ, તમારી એક નજર પર જાઉં હું વારી વારી રે…
કેટલાં લેશો…

– પરાગ રતનપરા