કનૈયા વિના

ઉદાસી દિવાળી કનૈયા વિના,
ન રાધા રુપાળી કનૈયા વિના.

નદી પણ વહે છે, ન ગાતી કશું,
ન પગને પખાળી કનૈયા વિના.

દહીં કોણ ચોરે? ન ગોરસ ઢળે,
ન મટકી ઉછાળી કનૈયા વિના.

વળી સાંજ, ગાયો ન પાછી વળી,
ન સંધ્યા ઉજાળી કનૈયા વિના.

પરાગે ગઝલ સાવ કોરી લખી,
ન આંખે નિહાળી કનૈયા વિના.

– પરાગ રતનપરા

#ગઝલ #રાધાકૃષ્ણ #ગોકુળ #વિરહ #ભક્તિ #પરાગરતનપરા
#GujaratiGhazal #RadhaKrishna #Gokul #Separation #Devotion #ParagRatanpara