હસ્તિનાપુર

આંખે પટા, તાળાં મુખે, મૂંગી સભા આજે ય છે,
લાક્ષાગૃહે બળતી રહે, છાની વ્યથા આજે ય છે.

પાસા શકુનિના ઍપમાં ફરતા રહે ઘરઘર હવે,
દાવે મુકાતી દ્રૌપદી, જૂની પ્રથા આજે ય છે.

ભીષ્મો વચનમાં બંધ છે, દ્રોણો પગારે બંધ છે,
સાચું કહે તો શૂળ છે, કેવી સજા આજે ય છે!

ધૃતરાષ્ટ્ર પૂછે: 'શું થયું?', સંજય કહે ટીવી ઉપર,
સાચું કશું દેખાય ના, એવી દશા આજે ય છે.

શંકા ભરેલો પાર્થ પણ ઊભો હજી રણમાં, ‘પરાગ’,
ને કૃષ્ણની ગીતા સમી સાચી કથા આજે ય છે.

– પરાગ રતનપરા

#ગઝલ #મહાભારત #હસ્તિનાપુર #વ્યંગ #સત્ય #પરાગરતનપરા
#GujaratiGhazal #Mahabharata #ModernSatire #SilentCourt #TruthPrevails #ParagRatanpara