ગજરો કોનો?

ભળકડે આવ્યા સાયબા, આંખે ઉજાગરો કોનો?
પાઘડીના પેચમાં ભરાયો મોગરાનો ગજરો કોનો?

આખી રાત મેં દીવો રાખ્યો, ઠરી ગઈ'તી થાળી,
ઝાંપે ઊભી તારા ગણ્યા, ગણી ગણી થઈ કાળી;
ખેસ પર તમારા અત્તરનો આ છંટકાવ કોનો?
ભળકડે આવ્યા સાયબા…

કહો છો કે ખેતરે હતા, વાડે ભેળાં ઢોર,
ખેતરમાં તો ઝાકળ પડે, ના ઝાંઝરના શોર;
બાંયે ભરાયો તૂટેલો આ કાચનો ચૂડો કોનો?
ભળકડે આવ્યા સાયબા…

પરાગ કહે: ગોરી રિસાણી, મોઢું લીધું ફેરી,
સાયબો બોલ્યો: ‘ભોળી! આ તો બેનીનાં લગનની ફેરી!’
હસી પડી ગોરી, તોય પૂછે: ‘મનમાં વસિયો કોનો?’
ભળકડે આવ્યા સાયબા…

– પરાગ રતનપરા