ફૂલ જેવું જીવીએ

ચાલ ને, ફૂલ જેવું જીવીએ રે, વીરા, ફૂલ જેવું જીવીએ,
કાંટે ઊગીએ તોયે હસીએ, ને સૌને મ્હેક દઈએ.

કોઈ તોડે, કોઈ ચૂંથે, કોઈ ચડાવે દેવ,
ફૂલ ન પૂછે કોણ, કેમ, બસ મ્હેકવાની ટેવ;
પાંખડી ખરે તો ખરવા દઈએ, ધરતીમાં ભળી જઈએ…
ચાલ ને, ફૂલ જેવું…

કોઈની વાતો વીણી વીણી, ન કરીએ મનમાં ભાર,
મીઠો બોલ લઈ લેવો, કડવો મૂકવો વાટ પાર;
મધમાખી જેમ મધ જ લઈએ, ઝેર નહીં ઝીલીએ…
ચાલ ને, ફૂલ જેવું…

પરાગ કહે: આ જીવતર નાનું, એક સવારનો મેળો,
સાંજ પડે તો ખરી જાવું, પણ મ્હેકીને જાવું, ભેળો;
જે આવે, તે રાજી થાય, એવું આંગણું રચીએ…
ચાલ ને, ફૂલ જેવું…

– પરાગ રતનપરા