ફકીરીમાં

નથી ગાદી, નથી તકિયા, છતાં રાતો ફકીરીમાં,
ગગનનો ચાંદ સાથી, ને કરે વાતો ફકીરીમાં.

હતા જે દોસ્ત દોલતના, ગયા દોલત જતાં, ત્યારે
ખરો તો આ જ ઈશ્વરથી થયો નાતો ફકીરીમાં.

ન ચિંતા કાલની, ના ચોરનો ડર, ના હિસાબો કંઈ,
સવારે રોજ પંખી સંગ, હું ગાતો ફકીરીમાં.

ન લોકર, ના તિજોરી, ના ઉધારીની કશી ચિંતા,
હતો ખાલી, થયો ખાલી, હવે જાતો ફકીરીમાં.

પરાગે ફૂલની ખુશ્બૂ વહેંચી રાહમાં સઘળી,
હવા સંગાથ ઝૂમે એ જ મદમાતો ફકીરીમાં.

– પરાગ રતનપરા

#ગઝલ #ફકીરી #મસ્તી #સંતોષ #વૈરાગ્ય #પરાગરતનપરા
#GujaratiGhazal #FakirSpirit #InnerRichness #Contentment #Detachment #ParagRatanpara