ફકત બાકી

ગયું ઘર, ને ગયાં સગપણ, હવે યાદો ફકત બાકી,
ગયા ગરબા, ગયા મેળા, અહીં ચાંદો ફકત બાકી.

હતી મા, ને હતી રોટી, હતો ચૂલો, ધુમાડો પણ,
હવે સૂના રસોડામાં, ‘જમો’ સાદો ફકત બાકી.

ગયા નેતા, ગયાં ભાષણ, ગયાં તોરણ, ગયા ઝંડા,
ગરીબોના ઘરે તો ખોખલા વાદો ફકત બાકી.

વહેંચ્યાં ભાઈએ ખેતર, વહેંચ્યું ઘર, વળી આંગણ,
હવે બંને તણી વચ્ચે, અહમ-વાંધો ફકત બાકી.

પરાગે શબ્દ વેચ્યા ના, ભલે ખાલી રહી ઝોળી,
બજારે સૌ ગયા, ને ત્યાં હવે સોદો ફકત બાકી.

– પરાગ રતનપરા

#ગઝલ #ખાલીપો #સ્મૃતિ #રાજકારણ #સ્વાભિમાન #પરાગરતનપરા
#GujaratiGhazal #WhatRemains #EmptyHome #BrokenPromises #IntegrityOfWords #ParagRatanpara