દોડમાં

ઊંઘ અડધી, ચા અધૂરી, ને સવારે દોડમાં,
જેમ ઊડે છે પતંગો, કો’ ઇશારે દોડમાં.

સાંજ ઢળતાં ઘેર જાઉં, દીકરો સૂતો મળે,
બાળપણ એનું વહી ગ્યું, હું કિનારે દોડમાં.

માર્કશીટે બાળકોનાં હાસ્ય પણ ખોવાઈ ગ્યાં,
ગોખણીના, ટ્યૂશનોના એ સહારે દોડમાં.

ફ્લેટ, ગાડી, લોન ને હપ્તા, હરખ ના ક્યાંય પણ,
ને હૃદય વેચાઈ ગ્યું આખું બજારે દોડમાં.

ફૂલ ખીલ્યાં બાગમાં, ને મ્હેક પણ ઊડી ‘પરાગ’,
કો’ક થોભે ના જરા, ના કો’ વિચારે દોડમાં.

– પરાગ રતનપરા

#ગઝલ #દોડધામ #શહેરીજીવન #પિતૃત્વ #ભૌતિકતા #પરાગરતનપરા
#GujaratiGhazal #RatRace #ModernLife #WorkLifeBalance #Materialism #ParagRatanpara