ધરમ

કહે કોણ, શું છે પવનનો ધરમ?
બધા પર વરસવું, ગગનનો ધરમ.

ન જાણે સુમન, કોણ ચૂંટી જશે,
સહજ મ્હેકવું એ ચમનનો ધરમ.

ન ભગવો, ન લીલો, ન ભેદો કશા,
બધાને સમાવે કફનનો ધરમ.

ન પૂછ્યું, ન જાણ્યું, છલક્યું જરા,
દ્રવે દુઃખમાં, એ નયનનો ધરમ.

ન ભૂખ્યો ગયો કોઈ ઘરથી, પરાગ,
થયો પૂર્ણ ત્યારે ભજનનો ધરમ.

– પરાગ રતનપરા

#ગઝલ #ધરમ #માનવતા #કોમીએકતા #કરુણા #પરાગરતનપરા
#GujaratiGhazal #TrueReligion #Humanity #Harmony #Compassion #ParagRatanpara