ઢળતી રહી

તેં નજર નીચી કરી, ત્યાં ચાંદની ઢળતી રહી,
ને પવનના એક ઝોકે ઓઢણી ઢળતી રહી.

ઓરડે દીવો બળે, ને બોલવું ભૂલી ગયાં,
રાતભર એ કોડિયાની રોશની ઢળતી રહી.

શબ્દ તો એકેય ના બોલ્યાં અમે એ સાંજના,
આંખથી આંખે છતાં, બસ લાગણી ઢળતી રહી.

દૂર મંદિરમાં હતું ઝીણું ભજન, ને સાંજ પણ,
એ જ સૂરે આપણી પણ રાગિણી ઢળતી રહી.

આ પરાગે ગીત ગૂંથ્યું, આપણા એ સાથનું,
ને સુગંધે ભીંજવી, એ યામિની ઢળતી રહી.

– પરાગ રતનપરા

#ગઝલ #પહેલોપ્રેમ #શરમ #મૌન #મિલન #પરાગરતનપરા
#GujaratiGhazal #FirstLove #ShyGlance #SilentLove #Togetherness #ParagRatanpara