છું એકલો

તેં લખેલી પંક્તિઓમાં ઝળહળું છું એકલો,
રાત આખી મીણ પેઠે પીગળું છું એકલો.

તું નથી, પણ તું લખેલા શબ્દમાં ત્યાં રાતના
હાસ્ય તારું, સાદ તારો સાંભળું છું એકલો.

વાંચનારા ‘વાહ’ બોલી, ને ગયા પાછા ઘરે,
હું જ તારા એક શબ્દે ટળવળું છું એકલો.

તું કહેતી ‘ચાંદ જોજે’, ને હજી હું રોજ ત્યાં
ચાંદની સાથે ઝરૂખે ઓગળું છું એકલો.

પીળચટ્ટા કાગળો ને આંખ ઝાંખી, ઓ ‘પરાગ’,
તોય એ અક્ષર અડે ને ખળભળું છું એકલો.

– પરાગ રતનપરા

#ગઝલ #પ્રેમકવિતા #એકાંત #વિરહ #સ્મૃતિ #પરાગરતનપરા
#GujaratiGhazal #LovePoems #Solitude #Separation #Remembrance #ParagRatanpara