ચા આપતો

ફી ભરી ના, ને નિશાળે માસ્તરે ચા આપતો,
દફતરો તાક્યા કરે ને ઉંબરે ચા આપતો.

ગામના નેતા પધાર્યા, ભાષણો શિક્ષણ વિશે,
છોકરો એ મંચ પાસે અવસરે ચા આપતો.

ભક્તની ભીડો ઘણી, ને દાનનાં ધન પણ ઘણાં,
એ ય ભૂખ્યે પેટ ઊભો મંદિરે ચા આપતો.

ઠેઠ મધરાતે થતી’તી કામની એની રજા,
ઊંઘમાં પણ એ સપનના ભીતરે ચા આપતો.

આ પરાગે શેર લખ્યા બાળકો માટે ઘણા,
આજ પણ એ બાળ એના પાંજરે ચા આપતો.

– પરાગ રતનપરા

#ગઝલ #બાળમજૂરી #ગરીબી #શિક્ષણ #સમાજ #પરાગરતનપરા
#GujaratiGhazal #ChildLabour #Poverty #RightToEducation #SocialReality #ParagRatanpara