ભાડાનું ઘર

ઘર અમારાં ક્યાં હતાં? આ આંગણાં ભાડે હતાં,
રોજ ખખડાવે ધણી જે, બારણાં ભાડે હતાં.

દીકરો મોટો થયો જે ખોરડામાં, એ ઘરે
ગોદ બાની એક સાચી, પારણાં ભાડે હતાં.

દીકરીના લગ્નમાં ઝગમગ થયું આખું ફળી,
રોશની, ખુરશી, બધાં આ તોરણાં ભાડે હતાં.

શ્વાસનું ભાડું ભરીને આ શરીરે જીવતા,
આંખ પરનાં પાંપણોનાં ઢાંકણાં ભાડે હતાં.

શબ્દ પોતાના હતા, બસ એટલું સાચું, ‘પરાગ’,
આ જગતનાં હેત ને ઓવારણાં ભાડે હતાં.

– પરાગ રતનપરા

#ગઝલ #ભાડાનુંઘર #સ્થળાંતર #ગરીબી #નશ્વરતા #પરાગરતનપરા
#GujaratiGhazal #RentedHome #Migration #Poverty #Impermanence #ParagRatanpara