આભાર છે

ચાંદનીનો, તારલાનો, રાતનો આભાર છે,
સાંજની એ લાજભીની વાતનો આભાર છે.

ઝૂંપડી નાની હતી, ને ખાટલો તૂટેલ પણ,
મા જમાડે પ્રેમથી, એ ભાતનો આભાર છે.

ઠોકરે શીખ્યો, દગામાં પાઠ પાક્કો થઈ ગયો,
એ જ દોસ્તોએ કરેલા ઘાતનો આભાર છે.

મંદિરે ને મસ્જિદે, ગિરજે બધે શોધ્યો તને,
આખરે ભીતર મળેલી જાતનો આભાર છે.

આ ‘પરાગે’ ફૂલ થઈ જે મ્હેક દીધી વિશ્વને,
એ હવાનો, એ ભ્રમરનો, સાથનો આભાર છે.

– પરાગ રતનપરા

#ગઝલ #આભાર #કૃતજ્ઞતા #મા #આત્મખોજ #પરાગરતનપરા
#GujaratiGhazal #Gratitude #Thankfulness #LifeLessons #SelfDiscovery #ParagRatanpara